網紅的藏寶箱#宇宙船 #生物觀察日記
20210324
《魔法蜜糖》
我屋企有一樽玻璃樽載着嘅蜜糖，咁樽蜜糖都喺度大約有十年八載啦，每次差唔多飲完呢，佢又會fill返滿，Keep住係呢個常滿嘅狀態已經好耐好耐。我平時返到屋企就會沖一杯牛奶落少少蜜糖，係我嘅習慣嚟嘅，最近因為有朋友叫我去佢餐廳玩，睇吓有咩拿手小菜，去煮下啦，咁老實講我最自豪嘅就係調奶，因為調酒呢就唔啱我玩㗎喇，但係調奶，我可以話係高手，平時已經好鍾意將唔同嘅嘢飲同牛奶撈埋一齊，我都好後悔點解忌廉溝鮮奶會俾人哋出先，如果唔係我小學就已經發咗達！
由於要經營嘅話呢，就需要大量嘅材料，咁我都要知道喺邊度先買到呢隻蜜糖，所以就問屋企啦：「呢一隻散裝嘅蜜糖有冇牌子，到底係邊度出㗎？」點知原來嗰啲蜜糖就係我哋屋企其中一個親戚製作嘅，咁我問喺我屋企入面管食物嘅細佬，到底係邊個親戚佢又唔知喎，佢話係阿媽攞返嚟㗎喎，咁我問阿媽，阿媽又話唔知喎，佢話係老竇叫佢攞返嚟㗎喎，咁我問老竇，老竇又話唔知喎，佢話係姑媽叫佢攞返嚟於是佢叫阿媽攞返嚟㗎喎！我見大家都好似好努力咁推卸責任，咁我都費事問落去啦，總之個故仔就係我屋企有個親戚係養蜜蜂嘅，定時定候就會比好多蜜糖俾我哋，由於係一個大陸嘅親戚，所以大家唔知亦都好正常嘅。
喺發現呢件事嘅時候我仲順便發現埋屋企好似有個牌坊喺大陸，聽講以前係貴族，後來落難，講係咁講啦，所以我而家就搞成咁啦，咁都唔係好差嘅，但係要返工囉，要靠😩揀音樂俾人聽😩換取糧食囉⋯⋯so far都真係未算好差，所以我唯有用語氣搭救。
我唔太夠膽追查落去個蜜糖到底係點樣嚟，因為我越嚟越覺得好似細個聽《一千零一夜》其中一個故事，裏面有一樽永遠都飲唔完嘅酒，但係你一定唔可以打開個瓶蓋，否則個魔法就會失效，我覺得我屋企裏面呢一樽蜜糖就係永遠都飲唔完嘅蜜糖，但係你唔可以去搵到底係邊個牌子，否則個魔法就會失效，事實上當我一發現我個親戚係喺大陸養蜜蜂嘅時候，我就總係覺得個魔法已經開始失失地效，你諗吓佢都唔會係寄落嚟㗎啦，印象中都冇收過件，即係話應該係佢拎落嚟俾我哋，又或者我哋上去拎返落嚟，咁但係都已經咁耐無返過去啦，佢哋又應該冇乜人落過嚟吖，咁我眼前呢一樽蜜糖係咪即係最後一樽呢？嗱你睇吓感覺上好似已經即時失效咗一半。
我將呢一樽蜜糖仲係滿嘅時候影咗張相，放咗上去我嘅社交平台，點知有好多人留言話俾我知，佢地屋企都有一樽來歷不明嘅蜜糖喎，都係用一個玻璃樽載着，但係就從來都唔知道係咩牌子，我開始覺得呢一批蜜糖可能係同一個源頭，冇理由咁多人都唔知屋企人樽蜜糖係咩來歷嘅！雖然呢，可能屋企裏面有嘅都唔一定要係魔法蜜糖嘅，可能你屋企有魔法XO醬啦、魔法腐乳啦、魔法茶葉啦、有啲人屋企甚至有魔法米通，呢樣野揭露咗兩個不可能並存嘅真相：
1. 其實我哋好多人對於自己嘅屋企真係一無所知，甚少屋企有人默默為我哋付出左咁耐我哋都當係理所當然，真係身在福中不知福。
2. 呢個世界真係有魔法。
你覺得呢？我就覺得係2。
Search